យានដ្ឋានជួសជុលរថយន្តមួយដែលមានឈ្មោះថា” CAM Auto Repair យានដ្ឋាន ខេម” បានបង្ហោះរូបអមខ្លឹមសារជាសាធារណៈដោយចោទប្រកាន់ទៅលើ អតីតតារាចម្រៀង លោក ទិត្យ វិច្ឆិកា ថា បានជំពាក់ប្រាក់ជាថ្លៃជួសជុលរថយន្តនៅការ៉ាស់របស់ខ្លួន រហូតជាង១ពាន់ដុល្លារ មិនព្រមសង ទោះបោះជា ខ្លួនបានព្យាយាមទាជាច្រើនលើកក្ដី ។
តាមការបញ្ជាក់ពីផេកផ្លូវការ ” CAM Auto Repair យានដ្ឋាន ខេម”នោះ បានរៀបរាប់ឲ្យដឹងថា ម្ចាស់”បទសុរិយារៀបអស់ស្ដង់គត់”រូបនេះ បានយករថយន្តទៅជួសជុលរហូតដល់ទៅ៣លើក ជុំពាក់ប្រាក់ខ្លួនមិនព្រមទូទាត់ឲ្យខ្លួន ដោយសន្យាថា ឲ្យថ្ងៃនេះថ្ងៃនោះជាច្រើនលើក ដែលសរុបជា ប្រាក់មានរហូតដល់ទៅ $1,146 ឯណោះ។
ផេកផ្លូវការ ” CAM Auto Repair យានដ្ឋាន ខេម”នោះ បានរៀបរាប់ថ្ងៃខែ នឹងចំនួនប្រាក់ដែលជំពាក់ថ្លៃធ្វើរថយន្តទាំង៣លើកបែបនេះថា ទិត្យ វិច្ឆិកា បានសន្យាជាច្រើនលើក ប៉ុន្តែមិនព្រមសង ទើបនាំឲ្យមានការបង្ហោះ ជាសាធារណៈបែបនេះ។
ជុំវិញការចោទប្រកាន់របស់យានដ្ឋានជួសជុលរថយន្ត ខាងលើនេះ មិនទាន់មាន ការឆ្លើយតប ពីលោក ទិត្យ វិច្ឆិកា បាននៅឡើយទេ ខណៈដែលទូរសព្ទតារាចម្រៀងរូបនេះធ្លាប់ប្រើកន្លងមកនោះ ខលមិនចូលឡើយ។
សូមរំលឹកផងដែរថា លោក ទិត្យ វិច្ឆិកា ថ្មីៗនេះ ត្រូវបានគេដឹងថា ទើបតែធ្វើពិធីឡើងគេហដ្ឋានថ្មីមួយកន្លែងដែលមានតម្លៃ រហូតដល់ទៅ១០ម៉ឺនដុល្លារឯណោះ ។
ប្រភព៖ CAM Auto Repair យានដ្ឋាន ខេម
រូបថត៖ Sabay