កំណើននៃការវិនិយោគពីបរទេសបានធ្វើឲ្យប្រទេសកម្ពុជាទទួលបានការបណ្តាក់ទុនវិនិយោគនៅក្នុងតំបន់សេដ្ឋកិច្ចកាន់តែច្រើនឡើង។ ខណៈកំណើនឡើងនៃចំនួនតំបន់សេដ្ឋកិច្ចពិសេសគឺជា សញ្ញាវិជ្ជមានសម្រាប់កំណើនសេដ្ឋកិច្ចរបស់ប្រទេសកម្ពុជា។
វិស័យសេដ្ឋកិច្ច សង្គមកិច្ចរបស់ខេត្តស្វាយរៀង កំពុងមានការអភិវឌ្ឍរីកចម្រើនគួរឱ្យកត់សម្គាល់នៅប៉ុន្មានឆ្នាំចុងក្រោយនេះ ពេលបច្ចុប្បន្នមានអ្នកវិនិយោគឯកជនមកពីគ្រប់ទិសទីដើម្បីអភិវឌ្ឍន៍ និងបង្កើនការងារជូនប្រជាពលរដ្ឋបានរាប់ម៉ឺននាក់។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
ជាមួយគ្នានេះខេត្តស្វាយរៀង មានព្រំប្រទល់ជាប់ជាមួយ ប្រទេសវៀតណាម គឺខេត្តឡុងអាន និងខេត្តតៃនិញ មានប្រវែង ២៥៨គីឡូម៉ែត មានច្រកទ្វារព្រំដែនចំនួន ៨កន្លែង រួមមាន៖ ច្រកទ្វារព្រំដែនអន្តរជាតិបាវិត ច្រកទ្វារព្រំដែនអន្តរជាតិព្រៃវល្លិ៍ ច្រកទ្វារព្រំដែនទ្វេភាគីសំរោង ច្រកទ្វារព្រំដែនទ្វេភាគីបុសមន ច្រកទ្វារតំបន់ព្រំដែនស្រែបារាំង ច្រកទ្វារតំបន់ព្រំដែនព្រៃតាអី ច្រកទ្វារតំបន់ព្រំដែនដូង និងច្រកទ្វារតំបន់ព្រំដែនខ្សែដែក។
ច្រកទ្វារព្រំដែនទាំង ៨ នេះគឺជាច្រកយុទ្ធសាស្រ្តដ៏សំខាន់ ក្នុងការជួយសម្រួលដល់ការធ្វើដំណើរចេញចូល ការចរាចរណ៍ដឹកទំនិញ និងកសិផលផ្សេងៗរបស់អ្នកវិនិយោគិន និងប្រជាពលរដ្ឋដែលរស់នៅតាមតំបន់ព្រំដែនផងដែរ។
ទន្ទឹមនឹងនេះ ខេត្តស្វាយរៀង ក៏មានតំបន់សេដ្ឋកិច្ចពិសេស កំពុងដំណើរការ ០៨កន្លែងគឺ៖ តំបន់សេដ្ឋកិច្ចពិសេសមេនហាតធេន តំបន់សេដ្ឋកិច្ចពិសេសតាយសេងបាវិត តំបន់សេដ្ឋកិច្ចពិសេសសានដុង តំបន់សេដ្ឋកិច្ចពិសេសនាគរាជ តំបន់សេដ្ឋកិច្ចពិសេសឈីលូ តំបន់សេដ្ឋកិច្ចពិសេសហាយផាក តំបន់សេដ្ឋកិច្ចពិសេសហ្គីហ្គារីសត និងតំបន់សេដ្ឋកិច្ចពិសេសអ៊ិនធ័រវៀ អូតូម៉ូបាល អ៊ិនដាសស្រ្ទី ខមផ្លេកស៍ ។
ដោយឡែកនៅទូទាំងខេត្តមានរោងចក្រ សហគ្រាស ឧស្សាហកម្ម ពាណិជ្ជកម្ម ទេសចរណ៍ សណ្ឋាគារ និងគ្រឹះស្ថាន សរុប ១៩៧កន្លែង បានបង្កើតការងារជូនប្រជាពលរដ្ឋចំនួន ៧៩.៩៥៧នាក់ រួមចំណែកកាត់បន្ថយការធ្វើចំណាកស្រុកទៅរក ការងារធ្វើនៅក្រៅខេត្ត និងកាត់បន្ថយភាពក្រីក្ររបស់ប្រជាពលរដ្ឋបានមួយកម្រិត។ នេះបើយោងតាមវេបសាយរបស់រដ្ឋបាលខេត្តស្វាយរៀង៕