ព្រលានយន្តហោះខេត្តបាត់ដំបង ត្រូវបានប្រមុខរដ្ឋាភិបាលដាក់ផែនការក្នុងការអភិវឌ្ឍឡើងវិញ។
លោក សឿម ប៊ុនរិទ្ធិ អភិបាលរងខេត្តបាត់ដំបង បានថ្លែងនៅក្នុងសន្និសីទសារព័ត៌មានកាលពីម្សិលមិញថា គម្រោងអភិវឌ្ឍន៏ព្រលានយន្តហោះ ខេត្តបាត់ដំបងឡើងវិញ ឈានដល់ការបោះបង្គោលកំណត់ព្រំដី និងកំពុងរង់ចាំការសម្រេចពីគណៈកម្មការអន្តរក្រសួង លើការដោះស្រាយបញ្ហាមួយចំនួន។
លោកបញ្ជាក់ថា រដ្ឋបាលខេត្តបានធ្វើការមួយជំហានជាមួយរដ្ឋលេខាធិការដ្ឋានអាកាសចរស៊ីវិល លើការរៀបចំចុះបញ្ជីដីជាលក្ខណៈប្រព័ន្ធ នៅក្បែរព្រលានយន្តហោះនេះ។
ការចុះបញ្ជីដីធ្លីជាប្រព័ន្ធគឺបានខ្វៀលដីព្រលានយន្តហោះរក្សាទុកមានន័យថា ចំណុចណា ដែលជាដីរបស់ព្រលានអាជ្ញាធរ នឹងមិនចុះបញ្ជីឲ្យប្រជាពលរដ្ឋនោះទេ។
លោក សឿម ប៊ុនរិទ្ធិ អះអាងថា ការងារដែលសេសសល់ស្ថិតនៅលើរដ្ឋលេខាធិការដ្ឋានអាកាសចរស៊ីវិល ជាមួយនឹងគណៈកម្មការ ដែលត្រូវនឹងបង្កើតឡើងនាពេលខាងមុខ។ ចំណែកអាជ្ញាធរខេត្ត មកដល់ថ្ងៃនេះ បានត្រឹមតែសម្របសម្រួល ដើម្បីបោះបង្គោលព្រំដីព្រលានយន្តហោះតែប៉ុណ្ណោះ ដើម្បីចៀសវាងកុំឲ្យប្រជាពលរដ្ឋចេះតែ ចូលធ្វើស្រែ និងកាន់កាប់បន្ថែមទៀត។
គួរបញ្ជាក់ថា ព្រលានយន្តហោះខេត្តបាត់ដំបង ត្រូវបានបិទដំណើរការតាំងពីឆ្នាំ ១៩៩១ ក្រោយពេលដាក់ឱ្យបម្រើវិស័យអាកាសចរណ៍យោធា មួយរយៈក្នុងសម័យរដ្ឋកម្ពុជា។ ព្រលានយន្តហោះនេះ ធ្លាប់បានបិទមិនឱ្យដំណើរការម្តងរួចមកហើយ គឺ នៅពេលដែលរបបខ្មែរក្រហមឡើងកាន់អំណាច ឆ្នាំ ១៩៧៥ ក្រោយពីបានកសាងរួចនៅឆ្នាំ ១៩៦៧៕